Labels

100 Tokoh Dunia (97) Alam (28) Alien (9) Artikel (266) Binatang (18) Catatanku (17) Do"a (7) Download (6) FACEBOOK (8) Fakta (20) Film (23) Foto (91) GaMe (3) Handphone (6) Imsakiyah (17) Indonesiaku (3) Internet (11) Islam (174) Kata2 (5) Kenapa? (9) Kesehatan (24) Kisah (35) Kisah 25 Nabi (22) Komputer (12) Lelucon (33) Minangkabau (21) Misteri (73) Musik (9) Nusantara (1) Olah Raga (17) Pendidikan (2) Photoshop (86) Puisi (14) Renungan (37) Sejarah (109) Teknologi (13) Tips n Trik (16) Tokoh (165) Tour De Singkarak 2011 (7) Tour De Singkarak 2013 (1) TV (7) Unik n Kreatif (286) Video (7) Widget (1)
Home » » ◕ Nasehat seorang mamak kepada kemenakan ◕

◕ Nasehat seorang mamak kepada kemenakan ◕

oleh Ricko Bahemar pada 30 September 2009 jam 16:34

ANAK DIPANGKU-KAMANAKAN DIBIMBIANG

Niniak mamak nan gadang basa-batuah,
Alim Ulama Tuangku nan kiramat , sarato Bundo Kanduang nan arih bijaksano,
kok mudo indak diimbaukan namo , kok gadang indak disbuatkan tuah , jo salam sajo ambo muliekan .
Assalamualaikum w.w.

Duduak surang basampik-sampik, duduak basamo balapang-lapang , baitu pitaruah niniak kito , molah kita taruihkan mambangkik batang tarandam , mangaji-ngaji ajaran Adat , Mudah-mudahan baguno untuak anak kamanakan kito nan mudo-mudo, isuak . Amin.

Indak gadiang nan tak ratak , manusia basifat khilaf , kok sasek ambo bakato, kok lupo ambo dalam alua dan patuik , tolong bilai dima nan senteng , tolong tukuak dima nan kurang.

Dalam ba gotong royong mambangkik batang tarandam , baiklah kito karajokan pulo apo nan dapek dikarajokan sacaro baketek-ketek di palanta ko , kok na bagadang alah dikarajokan oleh urang gadang-gadang di Sumbar tamasuak Pak Gubernur dan LKAAM nyo .

Salah satu nan paralu diawak kini adolah kaparaluan sahari-hari , misanyo mampalajari , apo kawajiban Mamak taradok Kamanakan , dan baa hubungan Mamak jo Kamanakan , manurut ajaran Adat di Minangkabau nan biaso disabuik urang system Matrilinial tu .

Salah satu pegangan dan padoman adolah sabuah pantun , barangkali indak ado urang Minang nan tak tahu jo pantun dibawahko :
 Kaluak paku , kacang balimbiang
Tampuruang lenggang-lenggangkan
Dibao urang ka Suruaso .
Anak dipangku kamanakan dibimbiang
Urang kampuang patenggangkan
Jago Adat jan binaso .


Pantunko barisi 3 pokok ajaran atau doktrin nan disuwarihkan oleh niniak moyang kito dari generasi ka generasi sampai ka kito kini nangko, yaitu :
1. Anak dipangku , kamanakan dibimbiang , adolah realisasi dari dwi fungsi nan diemban oleh satiok laki-laki di Minagkabau .
2. Urang kampuang dipatenggangkan , kawajiban sosial ditangah-tangah masyara kat , hablunmminannas manuruik hukum Syarak nyo .
3. Jago adat jan binaso , kewajiban satiok urang Minangkabau memaliharo nilai-nilai Adat dan budaya Minangkabau .

Untuak maisi ota dipalanta ko mari kito kunyah-kunyah nan partamu sajo , kok lai panjang umua kito taruihkan mangaji nan kaduo jo nan katigo , insyaallah . Caritoko adolah , hasie palajaran jo baguru nan ambo jalani diwaktu kaciak-kaciak tamaso kami ijok kakampuang , karano Baso diduduki tantara Bulando sampai akie tahun 1949 .

Cupak salingka Batuang , Adat salingka Nagari. Lain lubuak lain ikannyo, lain padang lain bilalang, namun ikannyo itu juo . Baitu kato urang tuo-tuo , tantang parbedaan-parbedaan nan ado antaro Nagari-nagari di Minangkabau .

Salain dari itu kamungkinan nan ambo tarimo , indak samo jo nan ditarimo oleh kawan-kawan di nagari lain , lain guru pasti lain surahnyo , lain koki lain pulo masakannyo . Untuak itu labiah daulu ambo minta maaf kapado para pakar , niniak mamak, alim ulama , sarato intelektual Minangkabau nan tagabuang di palantako , saandainyo indak sapaham kito tantang itu .

Manuruik pitaruah dari urang tuo-tuo , laki-laki di Minangkabau mamikua duo baban barek sakali gus yaitu : Partamu sabagai Urang Sumando ( apak paja ) dirumah anak , nan kaduo sabagai Mamak Rumah dirumah urang gaek , kaduonyo ambo sabuik Dwi Fungsi laki-laki di Minangkabau. Sabagai Rang Sumando ( Kepala Keluarga ) , anak dipangku aratinao , saratuih parsen anak jadi tanggungan bapaknao , makan minun, sikola, dan sagalonao , pokoknao indak buliah kaki anak manyingguang tanah, itu namonao dipangku . tapi ado bateh waktunao, yaitu sampai anaktu pandai bajalan surang Kalau lah tumbuah sisunguiknau dipangku juo anaktu , aaa.. lah gilo apaknao tu .
Pabilo anak tu dikatokan lah bisa bajalan surang , maso kiniko kalau lah mandapek Gala Sarjana atau lah mampu barumah tango .

Kamanakan dibimbiang , sampai kaliang kubua , baitu pitaruah urang tuo . Aratinao kamanakan tu , bajalan jo kakinao sandiri, si Mamak mambimbiang jo ujuang jari , jadi indak sabarek mamangku anak do , tapi sampai mati si Mamak punyo kawajiban mambimbiang Kamanakan , tarutamo masaalah Adat dalam kahidupan banagari, dalam panguasaan dan pangurusan harato Pusako Tinggi. Baa dizaman moderen bak kini, lai mungkin dikarajokan nan bak itu ? Insyallah lai , tantu bagi urang nan tau dan amuah mamakai ajaran Adat Minangkabau .

Ajaran ko bamulo dari laki-lai petani nan hiduik sapanjang maso dikampuang halaman nyo , nan dapek didatangi jo bajalan kaki dari rumah bini karumah urang gaek . Misanyo urang Balai Gurah babini ka Biaro atau ka Canduang , urang Baso babini ka Padang Tarok, atau ka Ujung Guguak , urang Panampuang babini ka Koto Lalang, urang Kamang babini ka Salo atau ka Magek , urang Batuampa babini ka Koto Naampek dan lain-lain .

Iduik di kampuang sahari-hari baladang, basawah dan bataranak , mananam tanaman nan kamahasiekan pitih untuk maiduki anak bini , misanyo mananam sayur-sayuran Lado, Taruang , Kacang, Pisang , Karambie, Timbakau, dan disampiang itu mambantu kamanakan mangarajokan sawah, tantu sasudah karajo dirumah anak salasai . Zaman saisuak , nan ado cuma tanago , tulang nan ampek karek, jadi mamak-mamak tu mambimbiang kamanakan jo tanago sarato ilimu dan pangalaman nan ado .

Manuruik ajaran nan kito tarimo , supayo baban utamo mamangku anak indak taganggu , mako untuak mambimbiang kamanakan tu , hari nan 7 dibagi duo , 5 hari mancari nafkah untuak anak-bini dan 2 hari untuak mambantu/mambimbiang kamanakan Karano kamanakan tu biasonyo banyak , mako mambagi hari nan 2 tu , tantu disasuaikan jo kaparaluan kamanakan , dan biasonyo mamak pun bukan cuma surang , ado baduo atau batigo bahkkan labiah dari tigo urang , jadi dapek dipikua basamo untuak itu diatur dan diarahkan oleh para ibu-ibu nan basangkutan supayo hasienyo samparono dan marato, Urang Sumando pun basanang hati manarimo . Di siko..lah fungsi Mamak Tunganai Rumah atau Mamak Kapalo Warih sarato Bundo Kanduang pamacik kunci nan arek, pamegang puro nan taguah , pusek jalo kumpulan ikan , akan dirasokan guno jo manfaatnyo ba mamak dan bakamanakan manuruik ajaran Adat Minangkabau .
Hari Juma’at adolah hari bakhti Mamak untuak Kamanakan , sasudah makan pagi dirumah bini , si Mamak akan pulang kakampung ibunyo , manjalani sawah nan laweh , mandaki bukik manurun lurah , mamareso padi disawah , maliek tanaman di ladang , kok ado paga nan rarak, kok ado padi nan masak , kok ado tanaman nan dirusak binatang lia , untuak disampaikan ka Kamanakan dirumahnyo . Si Mamak basumbayang Jum’at di kampong ibunyo, sasudah sumbayang Mamak pulang karumah Ibunyo atau karumah kamanakannyo , manyampaikan saran jo nasihat , kok ado nan basangketo laki-bini nan paralu dipaeloki , kok ado baban nan kadipikua basamo , kok ado taranak atau tanaman nan kamarugi . Sasudah langkok makan jo minum , mamintak ampun ka pado Ayah sarato Bundo, Mamak malangkah kumbali kakampuang bini , malanjuikkan karajo baban utamo , Rang Sumando dirumah anak , wajib manafkahi laie jo bathin , baitu kato pusako.

Kok tibo hari nan baiak kutiko nan elok, Kamanakan bujang dipadah urang , datanglah inyo karumah Mamak , manyambah mamintak ampun kapado Mamak sarato Etek , mamintak izin barumah tanggo kakampuang urang . Mamak mamikua tangguang jawab ateh namo dan kahormatan kaum jan sampai Kamanakan , babuek nan ka marugikan urang lain atau mamalukan kaumnyo sandiri . Mamak wajib macegah poligami , mamak wajib mamparsiapkan Kamanakan nyo untuk manjadi Urang Sumando nan baiak dan tapuji yaitu Rang Sumando Niniak Mamak . Mamak menjalehkan pantangan dan larangan bagi seorang Rang Sumando antaro lain , sifat-sifat buruak dan hino ; Rang Sumando Kacang Miang, Rang Sumando Langau Hijau dan Rang Sumando Lapiak Buruak . Itu untuak Kamanakan nan laki-laki , baa pulo untuak Kamanakan nan Padusi , itu kawajiban para Bundo Kanduang , Mamak Rumah Cuma manunjukan dan mamastikan satu tumpak Sawah Pangasingan , bagi panganten baru sabagai modal partamu barumah tango dari Pusako Tinggi .

Masaalah Mamak alah kito tinjau sacaro ringkas dan sadarhana, kini mari kito tinjau pulo hak dan kawajiban Kamanakan manuruik ajaran Adat Minangkabau nan kini kito usahokan dalam mambangkik batang tarandam . Manuruik ajaran Adat jo system matrilineal kekerabatan banyak macam dan tingkeknyo , ; Kamanakan nan batali darah, Kamanakan nan batali Adat dan Kamanakan nan batali Budi . Untuak itu kawajiban Mamak sacaro materi dan harato pusako sahinggo Kamanakan nan batali darah , salabiahnyo disasuaikan jo kabutuhan dan kamampuan si Mamak nan kamambantu .

Daulu Mamak mambantu Kamanakan jo tanago tulang nan ampek karek, tapi kini mamak lah manarimo gaji bulanan , mahetong pitih dikotak satiok hari , tingganyo jauah dikota-kota gadang , jaman moderen lah maubah caro-caro kahidupan masyarakat Minangkabau, Bank-bank tabungan lah ado kaganti Lumbuang padi nan lah tirih , internet lah dapek mampadakekan jarak nan jauah , satiok waktu Mamak jo Kamanakan dapek basuo . Lah masonyo kito mamikiekan konsep Pusako Tinggi dizaman moderen nan bak kini , untuak itu kito pulangkan kapado nan pandai para itelektual Minangkabau .

Alhamdulillah untuak itu niniak moyang kito lah maninggakan pitunjuak nan baguno di sagalo jaman . “ Sakali aie gadang – sakali tapian barubah …dst “ Kok nak bakisa tagak bakisalah ditanah nan sabingkah , kok bakisa duduak bakisalah di lapiak nan sahalai “ Allqur’an dan Sunnah Rasulullah pamaganyo . Tujuan hiduik tak lain adolah kasampurnaan hiduik didunie, dan kasampurkaan hiduik di akhirat . Tuntuik lah ilimu sampai kaujuang dunia, nan diranah Minang tatap akan baguno . Insyaallah .

Sahinggo iko lah daulu , kok dirantang namuah panjang, diambiak sakiro kapaguno, kudian kito sambuang pulo , …….. insyallah .
Wassalam dan maaf dari :

H.J. Inyiak Malako Nan Putiah ( Inyiak Lako ) ,
Asal dari Baso , 73 thn, Suku Malayu ,
Sawangan Permai C-2 . No. 16 , Depok.
HP. 0815 1455 5517


    • Dayu Darwin riko onde mokasih byk ko
      30 September 2009 jam 16:43 ·

    • Dayu Darwin mantap bana ko hahahhaa great jempol dua jari ko
      30 September 2009 jam 16:43 ·

    • Dayu Darwin sabana rancak ko hahahhaa hebat santiang anak amak hahahaaa
      30 September 2009 jam 16:44 ·

    • Ricko Bahemar hehehe.... heheheheh... UNI.... (malu..?)
      30 September 2009 jam 16:58 ·

    • Rajo Malano Rancak BAna,mohon izin ambo share yo sanak
      01 Oktober 2009 jam 2:00 ·

    • Rajo Malano apo hubungan jo Inyiek Malako,kami maimbaunyo Om Yun
      01 Oktober 2009 jam 2:01 ·

    • Muhariman Djambek Bagus.. saya jadi ngerti..
      01 Oktober 2009 jam 10:27 ·

    • Aidfilmansyah Mansur ambo agiah jempol sajo riko top tulisannyo ko
      02 Oktober 2009 jam 15:29 ·

    • Aidfilmansyah Mansur mantap ko
      02 Oktober 2009 jam 15:29 ·

    • Ricko Bahemar thanks all.......
      02 Oktober 2009 jam 16:21 ·

    • Ricko Bahemar INI TULISAN SAYA BUAT MENJELANG GEMPA DI SUMATERA BARAT..... BARU SAJA DI TERBITKAN LANSUNG GEMPA...!
      16 Oktober 2009 jam 15:47 ·

    • Riny Yunita Mantap.., rancak bana. Dwifungsi laki-laki Minang. Mohon izin di share ya bang.
      16 Oktober 2009 jam 22:29 ·

    • Rudy Gunawan Syarfi Seuah tulisan yg bagus dan bermanfaat sekali unt kito baco dan diturunkan unt rang mudo.. spy labiah mengerti.. Thanks Ricko!!
      16 Oktober 2009 jam 22:34 ·

    • Ricko Bahemar ‎@all. Ok Lanjutkan.....
      16 Oktober 2009 jam 22:43 ·

    • Rio Han de Viz mantap ma.......lai taka iko jo kamanakan ko ??
      19 Oktober 2009 jam 9:41 ·

    • Iqbal Tanjung nan tagarih bana nan bapaek Angku Datuak !!!!
      21 Oktober 2009 jam 21:07 ·

0 komentar: