Sakapua Siriah

Sakapua Siriah
Bismillahirahmanirrahim
Assalamualaikum Wr.Wb

Kapado niniak mamak nan gadang basabatuah
pucuak bulek jo urek tunggang
nan dianjuang tinggi di amba gadang
pai tampek batanyo pulang bakeh babarito
nan baumpamo kayu gadang ditangah koto
urek taserak tampek baselo
batang gadang tampek basanda
dahan kuek buliah bagantuang
daun rimbun dapek balinduang
tampek balinduang kapanehan
tampek bataduah kahujanan
nan bakato bana
aia janiah sayak nyo landai,ikan jinak hukumnyo adia.

sarato nan mudo pambimbiang dunia
nan capek kaki ringan tangan
capeknyo indak ka panaruang
ringannyo tangan indak ka pamacah
aso tarantang duo sudah
hatinyo suci bamuko janiah
tau dimalu jo sopan, ereang jo gendeang
sarato raso jo pareso

taruih pulo untuak bundo kanduang
limpapeh rumah nan gadang
sumarak di dalam kampuang hiasan dalam nagari
kok hiduik tampaik banasa kok mati tampaik baniaik
ka undang-undang kamadinah,ka payuang panji kasarugo

sarato kaurang banyak
nan indak baimbau namo dan basabuik gala
didalam cupak jo gantang dikanduang adiak jo pusako
ujuik tujuan buah rundiangan, sakiro paham di kahandaki
bahubuang dimaso nan kaditampuanh
musim nan tumbuah iko kini
syariatnyo lai bahakikat
lahia kulik manganduang isi, lahian manjadi buah ama
dek enggeran sako nan tagak
koto aman alam santoso, salamaik korong jo kampuang
nak aman anak kamanakan
tantang curaian jo paparan,bukan mahunjuak ma ajari
hanyo sekadar calak-calak pangganti asah
kok salah mintak dibatuakan kok panjang mintak dikarek
kok senteng tolong dibilai kok kurang mintak ditukuak
karano ilmu dituhan tasimpannyo kito nan bukan cadiak pandai

" dima kain ka baju, lah diguntiang indak sadang, lah takana mangko di ungkai....dima nagari kito kamaju adaik sajati nan lah hilang, dahan jo rantiang nan bapakai."